كان في سؤال عابر في تويتر عن مصادر دخل عن طريق النت، وطبعا علشان تويتر مش بيستحمل الكلام الكتير، قلت أفرد مساحة للموضوع دة لإنه موضوع كبير ومتفرع ومحتاج تفاصيل كتير نقدر نتكلم عنها، و إحتمال كمان يكون في أكثر من موضوع بخصوص الفكرة دي لمحاولة استيعابها بشكل كامل، هبتدي في الموضوع وأشوف هقدر أمشي فيه لحد فين.
أنا اشتغلت على كذا جهه خاصة بالربح عن طريق النت، واللي حقق معايا نجاح كان جوجل والأفيليت. ومن خلال خبرتي بشكل عام في الموضوع وبصفة خاصة في الجهتين دول هيكون كلامي ونصايحي وموضوعي.
جهات الصرف صاحبة المال
في الأول نتكلم عن جهات الصرف، والسؤال هو أية الجهه أو المصدر اللي عنده
استعداد يشغلك في أوقات عملك الغير رسمية أو من خلال وجودك في البيت؟ بالنسبة ليا
أنا شايف إنهم ثلاث جهات
الجهه الأولى: هي جوجل بشركاته المختلفة (يوتيوب – جوجل أدسنس).
الجهه الثانية: شركات بتدي عمولة على المبيعات.
الجهة الثالثة: شركات وسيطة بينك وبين مستهلك آخر.
أعتقد أن الثلاث جهات السابق ذكرهم هم من يشكلون هيكل التجارة عبر الإنترنت بشكل عام.
نقطة تانية محتاج أتكلم فيها وهي خاصة بمميزات الشخص طالب العمل عن طريق النت، لو اتكلمنا عن صفات هذه الشخصية هنلاقيها حد يبحث عن زيادة في الدخل وهو يملك خبرة في مجال معين، أو لديه مهارة حتى لو لم يكن لها مصدر رزق سابق بالنسبة له، ويريد استغلال هذه الخبرة أو المهارة في زيادة دخله وطرحها للناس للإستفادة وفي المقابل هيكون ليه دخل يناسب هذه القدرات أو الخبرات المهدرة والغير مستغلة.
وأخيرا قبل الدخول في الجد، مهم تعرف أنك هتحتاج تتعلم حاجات تانية خاصة بالتسويق أونلاين، ويكون عندك طول نفس وخطة طويلة المدى على ما توصل لمستوى معين تقدر تكبره وتنميه بعد كدة، الموضوع مش هيخلص في يومين ولا تلاثة، ولكنها عملية مستمرة محتاجة شغل كتير.
هنبدأ الكلام عن الحاجات السهلة البسيطة اللي الناس قدرت تعمل منها دخل كويس في الفترة الأخيرة، والملاحظ إن فعلا الناس قدرت تستغل قدرتها ومهارتها البسيطة في عمل مجتمع على منصات التواصل الإجتماعي قدر يدخل ليها دخل محترم كل شهر.
اليوتيوب
اليوتيوب بيوفر خدمة استضافة الفيديوهات مجانا، بحيث أي حد عنده فكرة فيديو وعايزها تنتشر يقدر نيزلها على اليوتيوب، واليوتيوب من ناحيته بيوفر خدمتين، الأولى هي استضافة الفيديو لإنه طبعا في الأحوال العادية الموضوع معقد جدا خصوصا بالنسبة للفيديوهات، الخدمة التانية خاصة بالتسويق ووضع الفيديو على محرك البحث بتاعه بحيث أي حد محتاج موضوع قريب من اللي انت عامله هيقدر يطلعه ويشاهد المحتوى اللي انت حاطه.
